MONATO

Politiko

IRLANDO

Virina protest-tendaro

Virina kontraŭmilita organizaĵo intencas krei konstantan protest-tendaron apud la internacia flughaveno Shannon [ŝanon] en okcidenta Irlando. Laŭraporte, la organizantinoj ricevis inspiron de britaj virinoj, kiuj dum jaroj tendumis ĉe loko nomata Greenham Common [grinam koman] en Anglio por protesti kontraŭ tiea usona milita bazo.

Lanĉis la proteston la fakto, ke, ekde la invado en Kuvajton kaj la golf-milito, la irlanda registaro permesas, ke usonaj militaj aviadiloj surteriĝu kaj reprovizu sin en Shannon per karburaĵo. Tamen lastatempe la surteriĝoj ĉiutage okazas, supozeble pro preparoj rilate eventualan militon kontraŭ Irako.

Neŭtrala

Diversaj grupoj jam organizis unutagajn manifestaciojn ĉe la flughaveno, sed la virina iniciato estas ĝis nun la unua konstanta. La manifestaciantoj atentigas, ke la Irlanda Respubliko estas laŭkonstitucie neŭtrala lando.

Krome Eŭropa Unio, por kontentigi la irlandan publikon, kiu unue voĉdonis kontraŭ la Nica Traktato pro timo, ke ĝi alportos perdon de neŭtrala statuso, aldonis al la traktato laŭ insisto de la irlanda registaro deklaron pri irlanda neŭtraleco. Nun multaj irlandanoj akuzas la registaron pri hipokriteco kaj sklaveca cedemo al la Bush-a administracio.

Garbhan MACAOIDH

Indekso
Aboni al MONATO
Flandra Esperanto-Ligo (FEL)
Lasta adapto de tiu ĉi paĝo: februaro 2003