MONATO

Ekonomio

LITOVIO

Eŭropaj prezoj minacas

Antaŭ la referendumo por aliĝo de Litovio al Eŭropa Unio (EU), kiu okazis en majo 2003, politikistoj laŭte kriis, kiel litovoj bone fartos, kiam ili estos en Eŭropo. Tamen, ju pli proksimiĝas la dato de la aliĝo (la 1an de majo 2004), des pli timtremigaj informoj venas koncerne estontajn prezojn.

Jam ekde la komenco de 2004 en Litovio altiĝis prezoj por benzino kaj dizelo. Oni klarigis, ke tio estis farita laŭ postuloj de EU. La subiĝo al la eŭropa regularo baldaŭ kaŭzos kreskon de pliaj prezoj. Oni supozas, ke varoj, importitaj el landoj ekster EU, plikostiĝos eĉ kelkoble.

Ekonomikistoj analizis, kiel evoluos la procezo koncernanta komercadon kun la ĉefaj partneroj de Litovio ekster EU. Evidentiĝis, ke la varoj el Ukrainio plikostiĝos je ĉirkaŭ 16,6 %, el Usono je 14,8 %, el najbara Belorusio je 10 %, el Japanio je 8,9 %, el Ĉinio je 7,8 %, el Kazaĥio je 6,5 %, el Rusio je 1,8 %.

Oni atendas, ke ĉinaj bicikloj ekde la 1a de majo jam kostos 42 % pli multe, televidiloj 35 %, radioaparatoj 9 %. Pro novaj doganimpostoj viando enportata el Usono plikostiĝos eĉ 2,1 ĝis 5,8-oble, rusa tritiko 2,7-oble kaj sekalo 2,2-oble. Temas pri kalkuloj de spertuloj pri ekonomiko. Vendistoj ĝis nun ne kuraĝas paroli pri eventualaj prezoj, kiujn litovoj vidos ekde majo. Ili emas prezenti pli mildajn prognozojn kaj trankviligas la klientojn, substrekante, ke la varoj el la landoj de EU malplikostiĝos.

LAST

Indekso
Aboni al MONATO
Flandra Esperanto-Ligo (FEL)
Lasta adapto de tiu ĉi paĝo: januaro 2004