MONATO

Serio

LA MANUSKRIPTOJ NE BRULAS

Ukraina Ikaro

Antaŭ nelonge ĉe la Ĥarkova Teknologia Instituto oni inaŭguris memortabulon omaĝe al Lev Makaroviĉ Macieviĉ (1877-1910), la unua ukraina aviadisto. Bedaŭrinde, en lastaj jaroj lia nomo fariĝis preskaŭ forgesita de nefakuloj.

Naskiĝinta en urbeto Oleksandrivka de Kiev-provinco (nun tiu urbeto troviĝas en Kirovograd-provinco), li lernis en kieva gimnazio, poste studis en Ĥarkovo, en tiea teknologia instituto. En Ĥarkovo li aktive partoprenis ankaŭ politikan vivon: eniris la ukrainan studentan societon, kies celo estis la plibonigo de vivkondiĉoj de la popolo; fondis en 1900 kun kelkaj aliaj studentoj kontraŭleĝan revolucian ukrainan partion.

Sed kompreneble ne pro soci-politika vivo oni memoru lin. Fininte en 1901 la instituton, li eklaboris en Sebastopolo kiel ŝipkonstrua inĝeniero. Li projektis la sebastopolan havenan stacidomon, faris 2 projektojn de kontraŭminaj bariloj kaj 14 projektojn de submarŝipoj. Krome li konstruis la unuan akvoaviadilon.

Li frekventis kurson por aviadistoj, kiu okazis en Francio. En septembro de 1910 li partoprenis la unuan rusan avian feston en Peterburgo. Tie li, kune kun alia piloto, la unuan fojon efektivigis noktan flugon. Same unuafoje, piloto (Macieviĉ) kunprenis pasaĝerojn, kaj inter ili estis la tiama rusa ĉefministro Stolipin kaj parlamentestro Guĉkov. Sed jam la 24an de septembro (laŭ la aktuala kalendaro la 7an de oktobro) li lastfoje flugis ĉielen. Lia aviadilo falis de 600-metra alto – ĝis tiu tago nekonkerebla nivelo ... Tiel li malfermis funebran liston de aviadaj viktimoj.

La nomon de Lev Macieviĉ portas premio por piloto, kiu flugos plej alte. La mallonga vivo de la ukraina Ikaro unike kunigis du naturajn elementojn – maron kaj ĉielon. Ene de siaj 33 jaroj li sukcesis fari tre multe kaj estas daŭre memorinda.

Dmitrij CIBULEVSKIJ/gla

Indekso
Aboni al MONATO
Flandra Esperanto-Ligo (FEL)
Lasta adapto de tiu ĉi paĝo: aprilo 2004